أهم نصائح أولى باك

أهم نصائح أولى باك 

                                                                                                                                               عصارة لتجربة  

السلام عليكم التلاميذ و التلميذات

قبل مانبدا فالموضوع كانبغي نرحب بزااف بالملتحقين بالصفحة ديالنا وهادي دعوة ليهم كذلك باش يشاركوها مع صحابهم ولي كايعرفو حيت كايتسناوكم مجمووعة من المعلومات او لي كانبغي نسميهم بالمفاجآت.. فمرحبا بالجميع

اليوم ان شاء الله كافتتاح للصفحة غاندوي ليكم على حاجة مهمة بزااف.. غاندوي على (الأولى باكالوريا) أو (السيزيام) هادشي لي غانقرل عصارة لتجربة و تجارب فهاد المستوى فتبعو معايا

معروف ان الشعب فالاولى باك مقسمة لمجموعة من الأقسام.. شعب علمية، أدبية، تقنية..
فكونك فهاد المستوى فأي شعبة من الشعب فخاصك تعرف انك متبوع بواحد الامتحان فآخر السنة لي هو الامتحان الجهوي..

فهاد المقال غاندوي معاكم فمجموعة من النقاط بشكل عاام كافتتاح .. فإلى عندك النفس الطويل كمل مع القراية وماتنساش هادشي ماغاتلقاهش فاي بلاصة 😋😋

1+من الجذع المشترك الى الاولى باكالوريا

اكيد ونتا فهاد المستوى (فحالة ماكانش سقوط العام الفايت) كنتي داك العام فالسانكيام.. ف وانت طالع حاول تتجرد من شي حاجة سميتها لي بغا يقرا العام طويل وما الى ذلك.. داكشي صافي مات.. المسؤولية كبراااات.. حاول تبدأ بنفس جديييد مبني على الجدية و العمل حيت من جهة النيفو كايطلع السانكيام ليس الا تتبيث للمفاهيم لي غاتخدم بيهم فيما تبقى.. ف زير معانا.

2+الاولى باك وعلاقتها بالثانية باك

غانحاول مانكثرش الهضرة ونجي من الاخير.. والله العظيم و ضيعتي عليك الدروس لي مهمة فالشعبة ديالك ولي نتا متبوع بيها فالباك و فرطتي فالدروس ديال هاد السنة الى هزك الماء.. راه والله الى الاساس و الركيزة ديال الباكالوريا هي داكشي لي كاتقرا دابا فمواد شعبتك وكانذكر على سبيل المثال العلميين المواد : الرياضيات، الفيزياء بشكل اساسي.. تقدر تسولني على السبب.. نجاوبك بلي مثلا نعطيك مثال فالاولى باك كاتقرا درس خاص فالرياضيات لي هو النهايات لي من خلالو كاتعلم كيفاش تحل مجموعة من الاشكاليات لي كاطيح فيهم فنهاية.. على حسب الحالة المهم هذا موضوع طوييل.. و هاد النهايات كدرس كايولييو هوما لي خدامين فدرس آخر ديال الاشتقاق يعني كولو نهايات.. فالوطني كاين تمرين عليه فغالبية الاحيان 11 نقطة بالنسبة لمسلك الفيزياء من الشعبة العلمية لي فيها دراسة دوال وهاد الدراسة كااااملة بدووووون استثناء فهي نهايات
اذا دابا صديقي و صدقتي تخايل معايا نتا ماشادش النهايات كيفاش غادير ليا لهاد الخير كاملو.. صافي نصليو على 11 نقطة؟؟
ايييوا جمع راسك

3+الجهوي

الجهوي كيف كايعرف الجميع هو امتحان فنهاية السنة الاولى من الباكالوريا لي كايكون فمجموعة من المواد على حسب الشعبة و كانذكرو هنا امثلة
الشعب العلمية : اللغة الفرنسية، اللغة العربية، الاجتماعيات، التربية الاسلامية.
الشعب الأدبية : اللغة الفرنسية، الرياضيات، التربية الاسلامية
الخ..

هاد الامتحان لي بشكل اساسي مرتبط بالباكالوريا و الوطني، بحيث كايشكل 25 % من النقطة العامة للباكالوريا.. وحتى المدارس العليا كاتعتمد على النقطة ديالو ار على نقطة من مادة منو (حسب المدرسة)..
يعني الاخوان راه الجهوي ممكن نوصفو ب (كن أو لا تكن).. اهم حاجة هي تكون فيك الغيرة على راسك وماتبغيش تشوف راسك فحسرة و انت مثلا عندك نقطة ماشي هي هاديك فيه.. وطلعتي للباك وباغي تجمع راسك.. فمهما خدمتي الجهوي دائما غايشكل ليك عائق الى كان ضعيف.. حس بالمسؤولية و خدم على راسك وتقاااااتل على راسك حيت ماكاينش لي يعقل علييك من غير راااسك.

كان هاد الخير جمل منها تحفيزية و تحسيسة وكذلك إخبارية.. وهذا غير باش تعرفو اشنو عندكم.. وحنا معاكم فكل نقطة من هاد النقط و غيرها  بالتفاصيل المملة بحول الله و قوته.. شكرا حيت كملتي معايا القراية ديال هاد المنشور.. وكانضرب ليكم موعد فأقرب وقت ان شاء الله