دروس علوم الحياة و الارض بالنسبة للامتحان

دروس علوم الحياة و الارض بالنسبة للامتحان

دوينا على الامتحان الوطني للرياضيات شنو الدروس لي كيكونوا فيه بالنسبة ل علوم تجريبية بمسلكيها ع.ح أ و ع.فيزيائية . المسالك بجوج يعني كيدوزوا نفس الامتحان تماما لكن الفيزياء علوم فيزيائيه عندهم بعض الدروس زايدة و بالطبع ف ع.ح.أ را غتكون زايدة عند اصحاب هاد الشعبة .

ندويو على علوم فيزيائية شنو عندهم ف ع.ح أ :

Consommation de la matière organique et flux d'énergie الوحدة الأولى استهلاك المادة العضوية وتدفق الطاقة

فيها جوج ديال الدروس لول غتعرفوا مني كناكلوا الكليكوز لي هو مادة عضوية كيفاش كيعطينا الطاقة لجسمنا شنو هاد سلسلة التفاعلات لي غتخلي C6H12O6 لي هو الكليكوز يرجع جزيئة طاقية لي هي عبارة عن ATP
الدرس الثاني ها حنا كلينا هاد السكر و رجع طاقة مزيان من الحوايج لي نقدر نستغل فيها هاد الطاقة هي التقلص العضلي ياك ! غتقراو كيفاش من جزئية طاقية عندي فجسمي ATP غنقدر ندير تقلص عضلي ..
ممم ممكن العضلة يكون فيها شي بنية مركزية مهمة هي لي كتقلص و باش تقلص كتخدم بديك الطاقة لي جاتنا مني كلينا السكر 🧐 نتوما لي غتجاوبوا مني تقراو ان شاء الله الدرس 😃😃

الوحدة التانية : الخبر الوراتي

صافي سالات الوحدة الأولى .. الوحدة الثانية هنا غيبانوا علينا شوية ناس ديال علوم رياضية لي قلبوا الشعبة  غيكونوا قارين الدرس الاول فهاد الوحدة بالتفاصيل كيما هي . الخبر الوراثي   من وراه الدرس الثاني غتقراو فيه انتقال الصفات الوراثية عبر التوالد الجنسي .

بلا مندويو على هاد الوحدة لي غنقوليكم هو لي ماجابش فتمرينها 5/5 خاصو العصا . هي لي كيعولوا عليها اصحاب الباك بزاف زوينة ومفهومة

الوحدة الثالثة : استعمال المواد العضوية و الغير عضوية .

 كاين لي كيسميه التلوث . بزاف كيقولوا هاد الدرس غا ثقافة عامة . يلا بغيتوا الصراحة يلا تحط ليكم وثيقة را كيكون مافيه لا حفاظة لا والو واخا متكونش عارف هاد الوحدة علاش كدوي تقدر تجاوب كلشي من الوثائق فهم وصافي ولكن يلا تحطات ف استرداد المعارف كتبغي شوية الحفاظة و تعقل على اضرار بعض الغازات مثلا و اسماءالطرق الزوينة لي تخلينا نتخلصوا من الزبل باقل اضرار بيئية .. يلا شفتي الوحدة غتلقى بلابلا بزاف ولكن كاين اساتذة ف يوتيوب مبسطينها متخافوا منها كاع والله يلا بسيطة فيها بعض الظواهر تفهمهم بحال الاحتباس الحراري و الامطار الحمضية .. الخ

  الوحدة الرابعة : الجيولوجيا

 لي كانت كتجيني احسن وحدة واخا فلخر تحطات ماشي فوثيقة ولكن استرداد المعارف ههه هي الجيولوجيا . عااارفا بلي 90٪ كيكرهوا الجيولوجي وتانا كنت كنكره هاد المادة كاملة و بالخصوص جيولوجيا ولكن تيقوني بلي الدرس لي غتقراو فالباك ماعندوش علاقة ب ديك الخريطة الطبوغرافية ديال السزيام ولا داك التخربيق لي كان كيجينا مامفهومش . غيعطيك فالوطني خريطة من عندو ا سيدي مقادة بسيطة وشي وثائق غي كيتعاودوا فالدراسة و نتا من الخصائص ديال المنطقة لي غيكونوا باينين ان شاء الله غتعرف واش هاد جبال لي عندك وقع بيناتهم اصطدام ولا طمر ولا طفو صافي .

نرجع بالمقلوب بعدا نقوليكم شنو كاين فهاد الوحدة. غتقراو بلي الكرة الأرضية كيوقعوا فيها قوى تقارب فشي مناطق وقوى تباعد فمناطق أخرى . اه اه داكشي د تكتونية الصفائح  نتا غتخصص هاد السنة غي ف قوى التقارب و بالضبط فالمناطق الجبلية . نتا غتكون ديجا قريتي بلي يلا عندك منطقة طمر را غيكون شذوذ حراري و زلازل و براكين و غتكون واحد السلسلة تحولية متكونة من الصخور فلان فلانية غتمشي الامتحان غتلقى هاد الخصائص إذن شنو سميت الظاهرة لي وقع؟ برافو الطمر . نفس الشيء بالنسبة للطفو و الاصطدام والله تا زوينة جيولوجيا غي متاخدوش عليها فكرة خايبة من لول باش بلعاني تقنعوا عقلكم يتقبلها .

خلاصة

شوفوا العلوم ديال شعبتكم ماشي صعيبة كيما كيقولوا بزاف ولكن الامتحان الوطني الاعوام الأخيرة ولا كيتحط فيها طوييل بزاف هااد العام كنعرف بزاف لي واعرين فيها ولكن مزربوش فالتحليل و للأسف ماكانوش النقط مرتفعين فهاد المادة بزاف . بلا متصدعوا راسكم تشريو فيها 600 كتاب و تخدموا تمارين من الفضاء انا كيبان ليا لي شرا 20/20 فيه الوطنيات و خدم الماكسيموم ديال الوطنيات و عقل مزيان على طريقة الاجابة الرسمية تا ولى كيقرب ليها بزاف را غيجيب نقطة ممتازة فهاد المادة . مغندخلش فالتفاصيل بزاف هههه مرة أخرى ندويو على الفيزياء ان شاء الله