نصائح غتفيدك في مسارك الجامعي

نصائح غتفيدك في مسارك الجامعي

.⛔️ 10 نصائح غتفيدك في مسارك الجامعي 💪🏻
⛔️ طاغي صحابك/صحاباتك يستافدوا معك ❤️ 

________
- [ ] صديقي صديقتي ❤️ أول حاجة شكرا على وفائكم للصفحة و إن شاء الله تستافدوا كتر يوميا 💪🏻 و الغرض ديالي أني نفيدكوم و كيف ينجح غيركم حتى نتوما تنجحوا بطرق لي الناس لي ناجحين كيخدموهوم ... المعلومة من حق الجميع و النجاح من حق من يعرف كيف يستغل تلك المعلومة و يدير بيها ... كنهضر معك بحال خوك ... لافاك عالم اخر العام كيدوز بزربة تفليتي تجيبها فراسك ... خدمتي و تقاتلتي غتحس بحلاوة النجاح ملي تشوف البسمة ف وجوه والديك ... و هنا من خلال تجربتي لسنتين فالجامعة حبيت نشارككوم بنصائح قيمة ليكنظن مغتلقاوهاش ف جهة أخرى ونا معكم طيلة السنة بمجهودات جبارة باش كلشي ينجح بإذن الله 💪🏻❤️ على بركة الله : 
- [ ] ___________
- [ ] ✔️ النصيحة الأولى : 
- [ ] جوج أنواع ديال الناس كيجيو لافاك : لي دارها ك إختيار و لي دارها إجبار يعني مجابش الله و بقات لو اخر حاجة يدير 👌🏻هي لافاك .. تيق بيا الا قلت ليك الا جيتي لافاك و انت ساخط عليها كيف كنقولوا مغتصور منها والوا حيت انت أصلا معاطيهاش خاطرك ف كيفاش بغيتيها هي تعطيك النجاح .. هادشي علاش عتبر لافاك بداية جديدة ف حياتك لي تفرض فيها نفسك و وجودك و لي تحقق من خلالها داكشي لي مدرتيش ف الليسي و لي تصلح فيها شخصيتك و أخطائك السابقة .. دخل من باب لافاك و انت مبتسم وانتي مبتسمة و كنوا راضيين عليها و افتخر انك كتقرا ف لافاك ماشي ليسولك اش درتي تحشم انك تجاوبوا ... لا ... كنعرف بزاف ديال الطلبة قدروا يوصلوا لمدارس و مهن ف طريق لافاك يعني ب دوك ولا ليصونص لي قسما بالله موصلوا ليهم ليدارو ليزيكول من ورا الباك مباشرة .. خلاصة النصيحة اللولة ❤️ عطيها تعطيك 
- [ ] ✔️ النصيحة الثانية : 
- [ ] عرفتي شنو هي أخيب حاجة تقدر توقع ليك ف لافاك هي أنك دخل متحمس ليها و تلاقا مع ناس لي كيفشلوك و كيكرهوك فيها .. شخصيا وقعات لي و كانت نتيجتها مأساوية و كارثية جدا .. يعني تعرف على نوع من الطلبة لي جاي فاشل و غرضوا يفشلك معه .. بعبارات : 
- [ ] واش لي قرا ف لافاك طفروا ف حياتوا 
- [ ] الناس خدات الدوكتوراه و مخداماش عاد تخدم انت 
- [ ] لافاك مافيها ميدار و مغدير بيها والوا تقرا تا تعيا فلخر تمشي تجلس حدا ماماك 
- [ ] اجي نعيشوا الحياة ليبغا ينجح العام طويل 
- [ ] .... 

ف نصيحتي لك حاول تفادا هاد الناس باش تفادا هاد الهضرة لي من جهة كتنقص من شخصيتك و ف نفس الوقت غتخليك عاصر فالعام اللول سنوات .. و أقسم لك انك ضروري ماتصادف هاد الطلبة اذن انت تحت مسوؤلية شخصيتك .. كانت ضعيفة ساهل يدوروك و يوصلوا لداكشي ليبغاو .. كانت قوية راه مغيصوروا منك والوا حيت انت شديد و حيت نتي تابتة ❤️بالعكس صاحب و عاشر لي بحالك عندو اهداف و طموح و باغي يقرا و يوصل هاد النوع غتستافد منو بزاف 💪🏻 خلاصة هاد النصيحة .. أي واحد يبغي يفشلني نخلي ليه Vu ويلا زاد فيه نخلي لو بلوك 
✔️ النصيحة التالتة : 
إياك ثم إياك ثم إياك تخلي تا يقرب ليكزام عاد تنوض تبغي تبدا اليريباراسيون ... حيت داكشي ليكان كيبان ليك ساهل و قليل بكترة ما قللتي من شانوا غيصدمك فلخر .. الخدمة تبدا من اول نهار دمر و تقاتل دير مجهود و مكاينش عييت ولا تال غدا ولا نتكونيكطا مع حبيبتي تال 4 صباح هي ا صديقي مستقبلها مضمون غيبان ليها ليضمن ليها مستقبلها و ديك الساعة نجح نتا بالحب .. هادشي مخسوش يكون .. حيت بكل بساطة ميمكنش دير جوج حوايج دقة وحدة .. و اكيد مدام غدير شي حاجة ربي مراضيش عليها جامي ربي يسهل عليك ف قرايتك عن تجربة أتكلم 🙏🏻 .. خدم على قرايتك دابا هي اللولة و بريباري من اللول لي درتيها ف نهارها تراجعها و تخدم التمارين .. نفس الهضرة لبنات .. تصاحبتي ضعتي من لخر .. حيت كنعرف بنات كانوا كيقراو نيت بعد مجاو لافاك و لقاو حريتهم التامة و معرفوش يستغلوها مشاو ف منحى غالط .. و النتيجة ضيعوا سنوات و ملي فاقوا لقاو راسهم تعطلوا .. خلاصة النصيحة .. من النهار اللول تبدا الخدمة ومكاينش تال غدا و نبدا حيت بقيتي هكاك و بعد عل اي حاجة تقدر تشوش عليك و تشغلك على هدفك الرسمي .
- [ ] 

✔️ النصيحة الرابعة : 
متعتدمدش غير على لافاك و البروف صافي .. قلب و بحت كتر و تعمق ف اي حاجة درتيها .. حيت مبقيتيش تلميذ .. وليتي طالب و طالبة .. البروف الا عطاك غير 10% راه دار معك المزيان .. حيت الدور ديالوا هو يوجهك و يعطيك الدرس كبيداغوجية و انت يبقا لك تفهموا بطريقتك و بحوتك الشخصية .. الحمد لله كلشي موجود دبا .. اليوتيب و لي PDF واي حاجة بغيتي اذن نتا لي كيتوقف عندك كلشي .. و لي مفهمتيهاش سير عند البروف سولوا ف المكتب ديالو منها تفهم و منها تقرب منو و تحاول تبني بلاصتك معه الشي لي غينفعك من بعد و ف حالة كانت البروف ماشي من هاد النوع .. كاينين طلبة لي فايتينك ف النيفو قصدهم و سولهوم غيخدموا معك .. حيت لافاك هكا دايرة شي كيعاون شي و هي دايرة أما إلا بقيتي ساكت .. تما بقيتي .. خلاصة النصيحة كلما قلبتي كتر كلما فهمتي كتر كلما غتجيب مزيان و تستفد كتر و متعولش على البروف خود غي الطريقة منو و مبادئ البداغوجية .
✔️ النصيحة الخامسة :
حضر لدروسك فالوقت و مكينش هذا مهم و هذا ماشي مهم .. حضر لكلشي و خود أقصى ماتقدر عليه .. و ملي تكون ف امفي جلس لقدام و نتبه و حط تركيزك الكلي و طفي ديك 3G و متبقاش حاضي بنادم بزاف ولا شاد الهضرة مع لي معك فوقت القراية منعرفك ماتعرفني و ملي نخرجوا ارا مانضحكوا .. بصح هادشي بسيط لكن كيأثر بزاف و يلا درتو العكس غتلاخظوا الفرق الكبير .. خلاصة النصيحة : دخل للكور بغيتك ديزاكتيفي العالم كامل حسب راسك كاين غي انت و البروف و منبقاش حاضي غي الكتابة .. فهم بزاف و كتب شوي و يستحب تاخد غي لينوط باش كيتوصل دار فليل تقرا الفكرة و تسترجع داكشي لي فهمتي عليها هكا حسن 💪🏻
👨🏻‍🎓كانوا أبرز خمس نصائح لي مهمين بزاف لطالب جديد بغا يتوفق ف لافاك و يبدا مزيان .. دابا ندوزو لنصائح مركزة و لي أساسية كذلك ( باش منطولش عليكم ) حيت هادشي كتير بزاف .. مزال نرافقكم طيلة السنة و نفصل ليكوم كلشي مزيان 
✔️ النصيحة السادسة : 
يستحسن البنت تخدم مع الولد و الولد يخدم مع البنت .. من خلال تجربتي هكا كتكون الموتيفاسيون كبيرة .. كنهضر على الخدمة ماشي التعناب و تضياع الوقت 😉 
✔️ النصيحة السابعة : 
تنظيم الوقت و إعداد برنامج عملي خاص بكل يوم فيه داكشي ليغدير كامل و محددوا بالوقت شي حاجة لي مهمة بزاف ف لافاك .. هاد النصيحة غنطيب لكم راسكم بيها العام كامل حيت بيها ماشي غير قرايتكوم لي كتقاد حتى حياتكوم غيولي عندها معنى ملي كتنظم فيها دونك نهضروا على هاد الفكرة بالتفصيل ف منشور اخر فالصفحة و غنشرح لكم كلشي 
✔️ النصيحة الثامنة : 
حاول تستغل الفياق بكري حيت قسما بالله حتى سبحان الله كتستافد كتر و فوقت قليل و بإيجابية كبيرة و بالتالي كنصحك كتر باش متسهرش بزاف فالليل حيت كضر بصحتك و منه كضر بعقلك اذن حتى المردودية ديال العمل و المجهودكتكون قليلة بزاف .. غير من نظامك النومي الا كنتي كتسهر بزاف .. نعس مزيان باش تفيق مزيان و اون فورم باش تقدر تعطي ف نهارك كتر و تستفد بحسن 
✔️ النصيحة التاسعة : 
نصيحة اختيارية لكن على حسابي .. حاول تخلي وقت متلا من الاحد ل الاحد خوذ ساعة فيه و خرج لمكان هادئ و هضر مع راسك و تفكر أهدافك و حاول تقلب على الأخطاء ديالك و تسترجع حياتك قدامك و تخمن ل مستقبلك .. وقت خصصوا لنفسك تقرب من شخصيتك و كن بوحدك .. تق بيا كتنفع بزاف حيت كتعطيك طاقة كبيرة باش تبدا نهار الاثنين بإيجابية كبيرة و متستسلمش كيف مكان الحال و اياك تفشل ويلا فشلتي تفكر الناس ليتقتلوا و جابوا ليصونص بمونسويون و سهل عليهم الله مالهم هما علاش مافشلوش مالك انت شناقصك .. بغيتكم تجربوا هاد القضية .. و تردوا عليا من بعد و بإذن الله غتغير فيكم شي حاجة 
✔️ النصيحة العاشرة : 
صراحة كان عليا نبدا بيها .. لي هي التقرب من الله سبحانه و تعالى ف اي عمل .. صلي و طلب الله يعاونك و ملي ضيق بيك دعي الله حيت هو الوحيد ليعالم باحوالك و هو ليقدر يستجب لك .. الصبر و العزيمة و العمل و التوكل على الله .. كيف يعقل ربي يضيعك و انت كدير هادشي كامل ؟ 
_________
نتمنى نكون فدتكم ولو شوي .. و الطلبة لي كانوا معايا العام لي فات و عملوا بكل توجيهاتي طيلة السنة كنت كنشوف نتائجهم كنت كنفرح خاصة لي خداو الباك ب 11 يعني نقط ضعيفة و دخلوا العام اللول بمونسيون راه إحساس واعر بزاف ❤️ و نتمنى نكن عند حسن نيتكم و معايا تبقاو ديما ناشطين موتيفيين و متحمسين كتر 💪🏻 و ان شاء الله يكون خير ❤️
________
مرحبا بكم ف انستغرام ديالي ( تشوفوا اش كندير نهار كامل فيما يخص لافاك ) و ( تموتيفاو ديما ) و تقدروا تسولوني على اي حاجة 
‏✔️Instagram : mahassinemohammed
- [ ] ______
TAHAJA MAS3IBA ILA NTA/NTI BGHITI 💪🏻
BZZZZZZZZF DL HUB LIKOM

 ❤️