كيفاش تفاليدي موديلاتك

كيفاش تفاليدي موديلاتك

📍بغيتي تا أنت تكون كتفاليدي موديلاتك ✅ الفرصة جات تال بين يديك 👌🏻 #مضيعهاش 

📍كيفاش نصايب #بروغرام لي نخدم عليه عام كامل و لي بيه بزاف ديال الطلبة #فاليداو و جابوا نقط مزيانة
⚠️ متنساوش بارطاجيو يوصل غيركم كاين لي محتاج يعرف 💪🏻❤️ و كترو من #التعاليق ❤️ 
_________________

‎📍للإشارة فقط .. هادشي لي غتقرا دابا كنعتبرو من أحسن ماكتبت في إطار مساعدتكم و إفادتكم .. الشي لي جربتو و لي كنت و مزال كنخدم بيه و لي كيعطي أحسن نتيجة الحمد لله .. فهاد المقال غنشارككم الحاجة لي ممكن تبدلك للافضل ف قرايتك و علاش لا طبقها ف حياتك 💪🏻 حيت ماشي مستحيل انك تفاليدي ف مسيرتك الجامعية و المشكل طبعا ماشي فيك ..المشكل ف طريقة خدمتك .. تقدر تمل من انك تقرا هادشي كامل لكن حاولت نتطرق لكلشي لاي حاجة .. تقرا هادشي ماشي كافي .. قراه فهمو و طبقو و بدا بيه السومستر ديالك كن اكيد انك غتشكرني بإذن الله .. دير هاد الخطوة ف حياتك و انت باغيها .. غيجيك صعيب فلول لكن مع المدة غتحس بحلاوة خدمتك ملي تشوف النتيجة .. منطولش بزاف و نبداو على بركة الله ❤️ 
___________
‎⭕️ علاش بروغرام ؟ 
‎كيتعتبر البرنامج العملي بين احسن الطرق لي تعتمد عليهم كطالب جامعي بحكم انك اصبحت طالب وليس ب تلميذ يعني كلشي كيتوقف عندك و البروف مجرد موجه للدرس فقط ، من جهة اخرى البروغرام غيسهل عليك الخدمة بزاف و مغتبقاش ف وقت البريبا ديال ليكزام تجري هنا و لهيه و تخدم ليل و نهار .. لا .. غيهنيك من هاد التكرفيس و غيعطيك افضل نتيجة الا حترمتيه بالصبر و العزيمة و التوكل على الله .. متعكزش و متفشلش .. سير عليه لمدة أسبوع تال أسبوعين و غتولفو غيجيك عادي من بعد .. تقسيم الخدمة ديالك على اليوم شي اجباري .
_________
‎⭕️ كيفاش نصايب بروغرام نافع و مناسب ؟ 
‎القاعدة الرئيسية للبروغرام هي كالتالي : 
‎داكشي لي درتو اليوم نراجعو ف نفس اليوم + داكشي لي غنقراه غدا نوجد منو 25% ( تاخد فكرة مسبقة على الدرس و تعرف الاهداف لي بعد شرح ديك البارتي من الدرس غيخسك تكون وصلتي لها ).
‎⛔️ كلما تعطلتي و أجلتي خدمة اليوم لغدا ولا تبقا تقول بلاتي لا تال غدا كاع .. غيتجمع لك كلشي و هكا كتكون محترمتيش البروغرام لي كيفرض عليك دير كل حاجة فوقتها المحدد و من طبيعة الحال الا مدرتيش داكشي لي عندك فبروغرام بلا متسنا نتيجة ايجابية . كنركز ديما على ضرورة احترامك لبرنامجك العملي 
‎⛔️ ف اطار خطوات اعدادك لبرنامج ديال الخدمة .. خاسك تعرف اخي الطالب و اختي الطالبة بلي القراية معندهاش وقت اي وقت عندك خاوي من المفروض عليك تستغلوا و دير فيه و لو حاجة من ليطاش لي عندك ف بروغرام .. و كيبقى احسن وقت ممكن تراجع فيه و خاصة مواد الحفظ و الفهم عامة هو الصباح بين 6 و 10 .. فهاد الفترة بالضبط دماغك كيسهال عليه الاكتساب بنسبة 70% مقارنة مع ماتبقى من النهار ../مقريتيش شي وقيتة سير للبيبليو و خدم ولو جزء من داكشي لي خاسك ديرو فنهارك .. لي بغيتك تفهم متسناش تال الليل بالتحديد عاد تقرا .. استغل اي وقت خاوي 
‎⛔️ المدة لي تخصصها ف مراجعتك لكل موديل ف نهار حاجة لي مهمة بزاف على حسب قدرتك على الاكتساب و هنا غنعطيكم ف الحالة العادية على حسب الموديلات : 
‎* موديلات الحفظ : بين ساعة و زوج سوايع
‎* موديلات الفهم : بين ساعة و ساعة و نصف 
‎* موديلات التطبيق : بين ساعة و ساعة و خمس و اربعين دقيقة
‎* فهاد التقسيم تم احترام معيار لا افراط ولا تفريط .. حيت الا جهدتي على راسك بزاف كتوصل واحد المرحلة مغتبقا تشد فيها والوا .. هادشي لاش خدم باعتدال .. فكل موديل عطيتك الحد الادنى و الاقصى على حسب قدرتك اختياخي

‎⚠️ نعطيكم متال لبروغرام ؟ 
‎نفترضوا كنقرا 6 موديلات ف الاسبوع و عندي الويكاند خاوي 
‎و بحساب انك كتقرا حصة درس ف اليوم 
‎كتاخذ ورقة و ستيلو و مسطرة كتصايب برنامج فيه اليوم | موديل لي غتراجع | التوقيت لي غتبدا فيه ولي غتساليه فيه | نسبة اكتسابك للموديل ( ديك البارتي لي راجعتي ) هادشي كديرو فالورقة لكل اسبوع بالتتابع 
‎متلا :

Jour : Jeudi 
Mdl à faire : Comptabilité 
Durée : 20h-21h30 
Pourcentage : 70% 
‎ف خانة ديال النسبة مهمة بزاف علاش حيت بيها كتقيم مستواك و مدى اكتسابك لديك البارتي و ملي متراجع متلا ديك المدة و كتلقا انك درتي نسبة ضعيفة عادي متزيدش كتر من الوقت المخصص .. زيد قرا داكشي لي لتحت و نشرح ليك كتر : 
‎⛔️ متفوتش خدمة زوج موديلات فاليوم و يستحب انك تخدم واحد حفاطة/فهامة و الاخر تطبيق يعني فيه فهم و تمارين .. هكا الطريقة غتخليك تموتيفا و متعكزش من تكرار الحاجة ف نفس النهار 
‎⛔️ الويكاند لي كنسميه خلاصة الاسبوع .. ولي مهم بزاف علاش ؟
‎دابا درتي بروغرامك مزيان طبقتيه ف ايام الدراسة مزيان .. السبت غتراجع داكشي ليدرتيه ف سيمانة كاملة و دائما بحساب ست موديلات اذن السبت قسمو على تلاتة ( صباح/بعد الغذا/الليل) و فكل وقيتة من هادو دير موديل و الاحد نفس الحاجة تلاتة الموديلات قسمهوم عل اليوم .. متنساش فقط الموديلات لي درتيهم و قريتيهوم فداك الاسبوع و هنا كتشوف ف بروغرامك اي موديل لقيتي فيه نسبة ضعيفة هاديك فرصتك فالويكاند انك تعاودو و تعطيه وقت .. ليلة الاحد راجع موديل لي عندك غدا و طبق القاعدة الرئيسية من جديد و عاود نفس الحاجة من جديد .
‎⛔️ بروغرام غيخليك تخدم بمعدل تلات ساعات فاليوم كحد ادنى و تقريبا 5 ساعات فاليوم كحد اقصى مقسمة بين التوقيت لي خاوي عندك و صباح الا بغيتي و قدرتي تخدم فيه و ليل .. تال لهنا مزيان ديطاييت كلشي .. ف حالة عندك اي سؤال خليه ليا ف تعليق 🙏🏻 
‎❌❌❌❌ أهم النصائح❌❌❌❌
‎1- ملي تكون/تكوني ف طبلة غتبدا بروغرامك ديكونيكطي العالم .. منك للبروغرام للكور .. و من الاحسن ديكونيكطي الكونكسيون تا تسالي خدمتك و ارا ماتكونيكطا .. 
‎2- ملي تكون خدام و مفهمتيش شي حاجة قلب عليها فاليوتيب ولا جوجل على ديك الحاجة بالضبط مديرش سمية الكور كامل
‎3- البروغرام كيبغي انك تمشي معاه متسبقش و متأجلش 
‎4- دير بروغرامك الخاص و متشاركوش مع غيرك حيت كل واحد و درجة اكتسابو للكور 
‎5- حاول انك تنعس مزيان باش تقدر تخدم ف نهارك مزيان 
‎6- قرا و تحرك يعني بغيت نقول بلي الرياضة شي حاجة لي مهمة بزاف متغفلش عليها حيت غتعاونك و غتربيك على حوايج ينفعوك من بعد 
‎7- متفشلش و كمل خدمتك تال اللخر .. الا مكنتيش مولف غي صبر و تحدا نفسك دير قدامك هدف لي باش توصلو خاسك تخدم على بروغرامك 
‎8- الناس لي ناجحين ف لافاك و بنقط مزيانة هادا هو سرهم شي حاجة لي ممكن اي واخد يديرها الا بغا .. اذن دير لي عليك و ربي غيسهل عليك و ملي تشوف النتيجة غتنسا داكشي لي كنتي كتحرم منو و عوض مضيع وقتك خصصتيه ف حاجة نفعاتك و خلاتك تجيب مزيان

__________
‎⭕️ غتبقا خدام بحال هكا بهادشي كامل .. تيق فيا مغتندمش .. هدا هو برنامج لي خسك ديرو و انت كتقرا .. الأسبوع المقبل نعطيكوم بروغرام ديال وقت البريبا ف عطلة لي كتعطا قبل الامتحان الى يوم الامتحان .. فقط تابعوا الصفحة ولا انستغرام الخاص بي 💪🏻💪🏻 
________
_______
‎📍 هادشي قلتو بالتجربة .. و النتيجة كتكون احسن من المتوقع .. تاحاجة مصعيبة لي صعيب هي كلمة منقدرش / خلي تال غدا / ... نتمنى نكون نفعتكم ولو بابسط حاجة ف اطار مقولة : خيركم من تعلَّم و علم 
‎🔥🔥🔥 #طاغيو صحابكم و بارطاhجيو توصل طلبة اخرين .. هاد المنشور دوزت فيه وقت ..#تفاعلوا معه .. كتحفيز نرجع نبوسطي ليكم فقرات متنوعة فالصفحة .. و أعتذر على التأخير و بالتوفيق للجميع بإذن الله .. الله يسهل عليكم 🙏🏻🙏🏻❤️