تطبيقات الادمان الايجابي

                                                       

                    تطبيقات الادمان الايجابي

على غرار المقالة ديال تعلم الانجليزية، بغييتي تزيد بحياتك للقدام و تتعلم حوايج جداد، تشوف محتوى نقي، تزيد شي حاجة ف دماغك، و لكن قبل ما تنوي تبدا كاتلقى راسك دخلتي ف Squad ف PUBG ولا Free Fire و بلاصة ماتقلب على شي حاجة تحسن من مستوى مستقبلك، كاتلقى راسك كاتقلب غا على شي Scope 8x يجي مع هاداك الSKS ديالك... اليوم غانحاولو عاوتاني نوجهوكم تجاه مجموعة ديال التطبيقات لي ممكن تزيد من الProductivity ديالك ف الجهاز الذكي ديالك ولا بكل بساطة باش تستهلك وقتك بطريقة إيجابية كتر.

ف هاد الجزء الاول ديال : تطبيقات الادمان الايجابي ، غادي نحطو 10 ديال التطبيقات لي غاتحفزك باش تا نتا تبدا تنتج و ماتبقاش خامر ف بلاصتك ماكاتفع تا واحد و حتى راسك ب تا شي حاجة.

Brilliant :

لا بغيتي تفهم العلوم، خاصك تبدا تفكر ك عالم، هادشي علاش تطبيق Brilliant.org كايتعتبر هو أحسن واحد ممكن تبدا بيه، بحيث كايعطيك مشاكل و مسائل علمية ف مختلف المجالات، و كاتحاول تجاوب عليها و تصحح أخطاؤك و تفهم الموضوع من كافة الجوانب ديالو، فيها البيولوجيا، الرياضيات، الاعلاميات، الفيزياء .. الخ كما يمكن تخدم بالنسخة المجانية ولا بالنسخة Premium لي كاتسوا 90 درهم فالشهر (بحال نيتفليكس لي ماكانخلصوهش)

Android : https://goo.gl/z8sRqZ
iOS : https://apple.co/2Gw0QSI

TED :

بغيتي Motivation؟ ولا بغيتي تعرف فين وصلت العلوم و التكنولوجيا ؟ ولا غي باغي تتعلم الانجليزية انطلاقا من السمع، ماكاينش ما حسن من TED (Technology, Entertainment, Design) هي واحد السلسلة ديال المؤتمرات لي كايهضرو فيها رواد مجالات التقنية، العلوم، الفن، الخ.. و كايشاركو تجاربهم من خلالها، يمكن تسمع لTED انطلاقا من موقع YouTube، ولا تيليشارجي التطبيق ديالهم من Play Store ولا App Store، ولا تسمع ليه انطلاقا من تطبيق Google Podcast

Android : https://goo.gl/FHqHzh
iOS :https://apple.co/2SEUs1W
Google Podcast : https://goo.gl/GdCKSB

Reddit :

نتا Gamer ؟ ولا Cinéphile ؟ آه سمحلي Programmer ؟ عالم ؟ كاطلع الصوارخ ؟ ولا كاتصايب الMemes؟ هادشي كولو كاين ف Reddit، و أكثر ... هاد الموقع خاصنا ليه مقالة و فيديو و شوف تشوف واش نعطيوه حقو، لي بغيتيها غاتلقاها فيه حيت هو أكبر تجمع ديال الGeeks ف كل المجالات فالانترنت و كايتعتابر هو الSocial Media رقم واحد لي ممكن تدمن عليه و تولي مزيان ف شي مجال على عكس فيسبوك، و تويتر لي غالبا ماكانخرجو فيهم ب تا شي منفعة (من غير المنفعة لي كاتاخدوها من كوجيتو ب طبيعة الحال)

Android : https://goo.gl/cxo9Jb
iOS : https://apple.co/2SGIxkv

Any.do :

خاصك دير بزاف د الاشغال فهاد النهار و خاصك تنظم داكشي بالوقت باش تكون productive as much as possible ياك ؟ بكل بساطة هاد الApplication فعالة و غاتعاونك مزيان.

Android : https://goo.gl/qM2AN6
iOS : https://apple.co/2X7rEOr

Evernote :

أحسن تطبيق ممكن تخدم بيه باش تسجل الNotes ديالك و تدخل ليهم من بزاف د الاجهزة، (حاسوب، جهاز لوحي، تيليفون آخر.. الخ) ولا تنظم فيها جدول أعمالك، هاد الApp كاتختصر عليك الوقت ، و تا الاستعمال ديالها مجاني و ساهل.

Android : https://goo.gl/P15sAB
iOS : https://apple.co/2EdCrio

TV Time :

نتا كاتتفرج بزاف ف المسلسلات و باغي تتبع المشاهدات ديالك و تحسب السوايع لي قضييتها و نتا كاتفرج، تتاوصل مع الناس لي كايعجبوهم المسلسلات ديالك، تشوف الReviews، تحط Memes .. الخ، هاد الApplication فيها كولشي و متوفرة للiOS و Android

Android : https://goo.gl/XWPmYU
iOS : https://apple.co/2X3hZbA

RunKeeper

شحال من واحد فينا كايبغي يعرف عدد الخطوات لي ضربهم فشي خرجة ولا فاش مشا يجري فالصباح، هاد التطبيق كايعطيك خارطة ديال المسار ديالك و السرعة باش كنتي غادي و حتى المسافة المقطوعة.

Android : https://goo.gl/rhCqJu
iOS : https://apple.co/2X8TPg2

Forest

كاتكون خدام ولا كاتحفظ و فينما تجي شي Notification .. مشات القراية / الخدمة، تطبيق Forest كايخليك مركز مع خدمتك ولا قرايتك بحيث كايخليك تحط تيليفونك و ماتهزوش لمدة من الوقت نتا لي كاتحددها، ف هاد الوقت كاتكون عندك قطعة أرضية، و فينما حطيتي تيليفونك لهاديك المدة و ماخرجتيش من التطبيق، كاتزرع شجرة، لي كاترمز لمجهودك و تركيزك.

هاد التطبيق فابور غي ف Android، بينما ب 1.9 دولار بالنسبة للiOS، هادشي لا غانحط البديل المجاني ديالو

Android : https://goo.gl/7UevBV
iOS : https://apple.co/2X3jh6B
iOS (Free) : https://apple.co/2SaMV6g

Genius :
يمكن أحسن تطبيق ممكن تلقى فيه الكلمات ديال الأغاني و المعاني ديال كل سطر باللغة الإنجليزية.
Android : https://goo.gl/jQ5G3c
iOS : https://apple.co/2Ign0tX

SoloLearn :
بغيتي تتعلم للبرمجة و أساسياتها مجانا و غي من خلال السمارتفون، هاد الApplication كاتقدم ليك دروس، و كاتعطيك إمكانية تدير بروفيل ديالك و تبدا خدمة من الهاتف ولا الجهاز اللوحي ديالك.
Android : https://goo.gl/P7yYMf
iOS : https://apple.co/2EfD8Il

حطو فالتعليقات أسئلتكم، اقتراحاتكم لتطبيقات زوينة أخرى باش نديروها ف الجزء 2