ميكانيك الكم بالدارجة

 ميكانيك الكم بالدارجة

ميكانيك الكم أو فيزياء الكم هو أخر ما غنات بيه الفيزياء، كيتعتبر من أعقد العلوم إلى مكانش أعقدها.

شناهو هاد الكم ؟ الكم و كيتسمى حتا الجوهر و كيعني أقل كمية ممكنة فشي جسم و ميكانيك الكم هو العلم لي كيهتم بدراسة سلوك المادة و الضوء فالمستوى الذري و الدون ذري، يعني تفسير سلوك الذرة و المكونات ديالها الأساسية بحال البروتونات، النوترونات و الإلكترونيات....

كيفاش حتى تولد هاد ميكانيك الكم؟؟

كيف ما كيعرف الجميع فالفيزياء علم تجريبي أي يعتمد على التجربة بشكل أساسي فتفسير أي ظاهرة، و باش يتم قبول شي نظرية فيزيائية ظروري ما تكون كتوافق مع التجربة.

فالنصف اللخر من القرن التاسع عشر غتظهر بعض التجارب متعلقة بدراسة سلوك الذرات و الجزيئات و مغيلقاولهاش شي تفسير لحقاش كانو كيعتامدو على الميكانيك الكلاسيك باش يفسرو هاد الظواهر (الميكانيك كلاسيك هي الميكانيك لي من كتدرس الأجسام الفوق ذرية من حبة الرمل حتى للكواكب و المجرات و كتعطي أي تفسير لحركة هاد الأجسام بدقة ).

هنا غيلقاو العلماء بلي من الضروري التفكير فشي طريقة جديدة قادرة تفسر هاد التجارب و هاد الحاجة هي لي غتسمى بميكانيك الكم فيما بعد.

العظمة ديال هاد العلم كتجلى فأنه خلال ال30 سنة اللولة من القرن ال20 كتر من 20 عالم غياخدو جائزة نوبل بسبب أعمال متعلقة بهاد العلم.

أول واحد غيجيب فكرة الكم هو سي بلانك, فاش غيبانلو بلي الضوء ميمكنش يكون كيتدفق بشكل متواصل و ضروري ميكون كيتدفق بشكل متقطع و بكميات محددة, الشي لي مغيقبلو تا واحد لحقاش كان معروف بلي الضوء عندو طبيعة موجية و كيتدفق على شكل موجة متصلة.

و أول واحد غيقتانع بالفكرة د بلانك هو ألبرت أينشتاين و قال معى راسو هاد الفكرة هي لي غتخليني نفسر ظاهرة << مفعول الكهروضوئي >> (L’effet photoélectrique ) هاد الضاهرة كتقول بلي الضوء إلى سقط على شي صفيحة معدنية معينة بطول موجة معين غيطلق واحد التيار كهربائي , أي غيطلق إلكترونات من هاد الصفيحة , وقال بلي هادشي ميمكن يكون إلى إذا كان الضوء عبارة على جسيمات ’’ مثال بسيط باش تفهم و مدوخش , أينشتاين قالك أسيدي إلى خدينا الإلكترون بحال شي كرة د البيلياردو راه حتا داك الضوء لي كيخلي الإلكترون يتحرر من بلاصتو خاصو يكون بحال شي كرة د البيلياردو أخرى باش تقد تضرب فالإلكترون و تحررو من بلاصتو.

لكن هادشي كيضرب فنظرية أن الضوء عندو طبيعة موجية و لي مبرهن عليها تجريبيا بالتجربة التالية ’’ كيطلقو الضوء من جوج مصابح حدا بعضها و كيلقاو بلي هاد الأضواء كيوقعلها واحد التداخل و هو نفس الشي لي كيحدث فاش كيتلاقاو جوج أمواج فالبحر و جل الأمواج . أينشتاين منفاش هادشي و قال بلي الضوء راه موجة و جسيم و هو شيئ غريب أنذاك .

بعد بضع سنوات جا سي لويس ديبروي و قال بلي الضوء عبارة على جسيمات ذات طاقة متقطعة و موجة فنفس الوقت و قال بلي هادشي كينطبق حتى على الإلكترونات , أْوْ الإلكترون موجة ؟؟؟ و باش نتأكدو أجي نطبقو نفس التجربة لي تدارت على الضوء ونشوفو النتائج , و بالفعل دارو التجربة و لقاو بلي الإلكترون كيتصرف على شكل موجة ’’ هاد التجربة من بعد غيطبقوها بعض العلماء و غيعدلو عليها و غيلقاو شي الحاجة الحمااااق ‘‘ باش منطولش بزاف غنهضر على هاد التجربة فموضوع منفصل مستقبلا إن شاء الله . و إلى بغيتي تبحث فيها راه سميتها ’’ تجربة الشق المزدوج ‘‘.

دبا إلى كان الإلكترون موجة يعني المادة يصفة عامة موجة , يعني نتا لي كتقرا فهادشي راك موجة .

المهم من بعد غيجي سي شرودنغر و غيدير واحد المعادلة مشهورة سماها ’’ المعادلة الموجية ‘‘ ولي كتوصف حركة الإلكترون , لكن فاش غيقولوليه حددنا بلاصة الإلكترون أسي شرودنغر غيقولهم الله أعلم , قالوليه عطينا غي السرعة باش كيتحرك قالهم الله أعلم , و هما يقولوليه عطينا غي التيساع مفيدكش ....

جا سي هايزنبرغ حس بلي شرودنغر تحرج و قالهم أسيادنا راه هاد الأسئلة مخصهاش تتسول أصلا , و دار واحد المبدأ سميتو ’’ مبدأ عدم التأكد ‘‘ و قالهم فيه ميمكنش تحدد مكان و سرعة الإلكترون فنفس الوقت إما ترضاو بلي الإلكترون موجة و تعرفو كيفاش كيتحرك و تا واحد مايسول فين كاين ؟ , يا إما ترضاو بلي هو جسيم و حتى ميسول كيفاش كيتحرك ؟

جا من وراه عالم أخر سميتو ماكس بورن قالهم ريحو أنا غنلقالكم الحل ’’ بصح مغنقدش نقولكم فين كاين الإلكترون و هو كيتحرك لكن غنعطيكم إحتمال فين ممكن يكون الإلكترون و شد معادلة شرودنغر و عدل عليها و دار معادلة جديدة ممكن تعرف من خلالها إحتمال وجود الإلكترون فشي بلاصة من عدمها.

هادي غي واحد النبذة صغيرة على هاد العجب لي هو بحر معندوش قاع , شلا حوايج متطرقتش ليهم باش منغلط و نغلطك معايا .

و لا كان هادشي لي كتبت جاك غريب و عجيب سمحلي نقولك بلي الهاتف أو البيسي لي كتقرا منو هادشي راه خدام بسبب هاد العلم و المبادئ ديالو .